BERRIAK
DONOSTIAKO HONDARTZEK EDUKIERA KONTROLATUKO DUTE, ERABILTZAILEEN SEGURTASUNA BERMATZEKO
Aurtengo hondartza denboraldia koronabirus bidezko pandemiak eragindako osasun egoerak baldintzatuko du. Oraindik ez dute zehaztu noiz hasiko den ofizialki denboraldia, eta hondartza duten Gipuzkoako gainerako udalerriekin adostuko dute, egun berean denak batera hasteko.
Donostiako Udalak, osasun-egoerak eskatzen dituen segurtasuna eta beharrezko urruntze-neurriak bermatzeko asmoz, erabaki du gure hondartzetan ohikoak diren zerbitzu batzuk ez direla emango aurten.
Marisol Garmendia Gune Publikoko zinegotziak adierazi duenez, "Uda honetan hondartzek ez dute olanarik, gabarroirik, kabina kolektiborik, igeriketa ikasteko igerilekurik eta bestelako ohiko zerbitzurik izango, eta, espazioa gehiago aprobetxatzeko eta, batez ere, osasun-arriskuak saihesteko, kentzea erabaki dugu".
"Autorregulazioa eta bakoitzaren erantzukizun pertsonala izango da gakoa uda honetan", azpimarratu du zinegotziak. "Denboraldi honetan ezin izango dugu egun osoa hondartzan eman, eta lekua utzi beharko dugu beste batzuek ere eguzkia har dezaten."
Kontxakoa da, hain zuzen ere, bere baldintzak direla-eta bere funtzionamendua gehien aldatuko duen hondartzetako bat. "Itsasgoran, hondartza hustu eta itxi egin beharko da, ezinezkoa baita pertsonen arteko distantziak bermatzea", adierazi du Garmendiak, eta hiru hondartzen edukiera denbora errealean kontrolatuko duen aplikazio teknologiko bat lantzen ari direla esan du, sarbideetan kontrol neurriak hartzea ahalbidetuz. "Itsasgoran, Kontxara kirola egitera doazenak bakarrik sartu ahal izango dira, ez bainatzera eta eguzkia hartzera", esan du zinegotziak.
Denboraldi ofiziala alde batera utzita, hondartzetara astelehenean sartu ahal izango da bainatzeko edo eguzkia hartzeko, Euskadi 2. fasera pasatzen bada. Denboralditik kanpo daudenez, ez da soroslerik egongo, ezta gainerako zerbitzurik ere, eta erabiltzaileen erantzukizuna eskatuko da, erabiltzaileentzat arriskutsuak izan daitezkeen pilaketak saihesteko.
DOKUMENTAZIOA
BANNERRAK
