BERRIAK
AÑORGAKO BOULEBARIZAZIOAREN BIGARREN FASEA HASI DA
Aste honetan hasiko dira Añorgako errepidea boulevarizatzearen bigarren faseko lanak. 478.821,22 euroko aurrekontuarekin, obrak hiru hilabetez luzatuko dira; beraz, dena ondo badoa, baliteke aurtengo azken hilabetean bukatzea.
Hiri Proiektuen zinegotziak, Duñike Agirrezabalaga sozialistak, adierazi duenez, "lan hauek Añorga Txikira eta Errekalderako sarbideko biribilgunean hasten den errepidearen eraldaketa osatuko dute, zeharkaldia bide lasaiago eta geldiago bat eginez, non bizikletek eta oinezkoek protagonismoa hartzen duten ibilgailu pribatuaren aurrean, bere abiadura nabarmen motelduz".
Lehen fasea 2015eko irailean amaitu zen, eta Mugikortasuna Kudeatzeko Europako Plataformaren saria jaso zuen, bereziki bizikletentzako aparkalekuen sustapena. Bigarren faseak hasitako proiektuarekin jarraitzen du, eta GI-21 errepidearen tarteko biribilgunearen (Unanue Berri baserriaren ondoan) eta Errekaldeko biribilgunearen arteko zatia hartzen du. Zati hori osorik berritu eta berrantolatuko da.
Errekaldeko biribilguneak bi zirkulazio-errei ditu gaur egun, 4 metroko zabalerakoak, eta 15,3 metroko barne-erradioa dute. Jarduketa honetan biribilgunea ekialderago mugituko da, oinezkoen eta bizikleten arteko elkargunerako beharrezko espazioa trenaren trazaduraren ondoan uzteko.
"Biribilgunearen hiru sarbideetako irteerak zirkulazio-errei bakar baten bidez egingo dira; biribilgunerako sarrerak, berriz, bi erreitan izango dira, Añorga auzotik datorren konexioa izan ezik, horrek errei bakarrekoa izaten jarraituko baitu oinezkoen eta txirrindularien ibilbidearekin batera egin ahal izateko", nabarmendu du Agirrezabalagak.
Errekaldeko biribilguneko irteeratik 75 bat metrora, tarteko biribilgunerako norabidean, oinezkoentzako pasabide semaforizatu bat jarriko da, botoi baten bidez arautua, eta, horrela, bi aldeak batera dauden gunea lotuko da. Pasabide semaforodunak irlatxo bat izango du zirkulazioaren bi noranzkoen artean, oinezkoari segurtasun handiagoa emateko. Gainera, behar bezala argiztatuko da, argiteria publikoarekin. Pasabide semaforizatu horren ondoan, 33,60 metroko luzera duen autobus-geraleku bat jarriko da, markesinarekin eta iritsieren berri emateko zutoinarekin.
Obren bigarren fase honetan sartzen diren bi biribilguneen arteko bide-zati horretan, egungo bionda kendu egingo da, eta tarteko erdibitzaile bat sortuko da, errepidea estutzen ari dela sentituko duena, eta, beraz, ibilgailuen zirkulazioaren abiadura murriztuko duena.
Obren bigarren fase honetako tartearen baterako espazioaren akabera aglomeratu asfaltikoa izango da, galtzadatik lorategiz bereizita. Bidegorriak 2,5 metroko zabalera izango du. Beharrezkoa izango da lekualdaketak egitea eta hormigoi aurrefabrikatuzko egungo hesia handitzea, aldi bereko eremuari jarraipena emateko eta erreiaren zabalera murrizteko.
Tarteko biribilgunean, Unanue Berri baserriaren ondoan, oinezkoentzako pasabide beheratuak egokituko dituzte, baserriaren sarrera hobetuz. Gainera, espaloia handitu egingo da, aglomeratu asfaltikoko akabera duen aldibereko zati baten bidez. Errekastoaren ondoko koexistentzia-eremua biribilgunearen hegoaldean dagoen oinezkoentzako zatiarekin lotzeko, semafororik gabeko oinezkoentzako pasabide bat sortuko da, eta behar bezala argiztatuko da. Horretarako, egungo irlatxoa beheratu beharko da.
Errepideak 30 zentimetroko zabalera duten drainatze-arekak izango ditu, euri-urak hustutegien bidez biltzeko.
Obrak JAIZUBIA OBRAS Y SERVICIOS S.L. enpresari esleitu zaizkio, 478.821,22 euroan (BEZa barne). Obrak egiteko epea hiru hilabetekoa izango da.
DOKUMENTAZIOA
BANNERRAK
